Búgin mámleketimiz basshısı tálim tarawı wákilleri menen ashıq sáwbet ótkerip, taraw xızmetkerleri, oqıwshılar hám ata-analar ushın bir qatar jeńillikler hám jańa imtiyazlardı járiyaladı.

1. Baslawısh klass ustazları hám 4-klasslar ushın

• Dáslepki ret 4-klasslar arasında pán olimpiadası ótkeriledi: Rayonlıq basqıshta jeńimpaz bolǵan oqıwshılar zamanagóy kompyuterler menen sıylıqlanadı.

• Ustazlarǵa 100 million somǵa shekem sıylıq: Usı olimpiadada jeńimpaz bolǵan oqıwshılardıń baslawısh klass oqıtıwshılarına bir mártelik pul sıylıqları beriledi:

– Rayonlıq basqısh ushın — 10 mln som;

– Wálayatlıq basqısh ushın — 50 mln som;

– Respublika basqısh ushın — 100 mln som.

2. Anıq hám tábiyiy pánler ustazları ushın (Matematika, Fizika, Ximiya, Biologiya, IT)

• Klasta 25+ oqıwshı bolsa — 2 toparǵa bólinedi: Sabaq nátiyjeliligin arttırıw maqsetinde klasta oqıwshılar sanı 25-ten assa, sabaqlar eki toparǵa bólinip ótiledi.

• 100 mektepte 100 payızlıq ústeme: 100 mekteptiń 1 klastan bolǵan toparında matematika, IT hám tábiyiy pánlerdi tolıq inglis tilinde oqıtatuǵın ustazlar hám tayarlıq toparı pedagoglarına 100% ústeme tólenedi.

• Olimpiada trenerlerine tuwrıdan-tuwrı Joqarı topar: Xorezmiy (matematika), Farǵaniy (fizika), Beruniy (informatika/anıq pánler), Ibn Sino (biologiya) hám Mendeleyev (ximiya) sıyaqlı abıraylı olimpiada jeńimpazların tayarlaǵan ustazlarǵa attestaciya sınaqlarısız, tuwrıdan-tuwrı joqarı topar beriledi.

• Sertifikat ushın 50% ústeme hám qárejetler qaplawı: Pán boyınsha Milliy sertifikat alǵan pedagoglarǵa hár ayda 50 payız ústeme tólenedi. Sertifikat alǵan barlıq oqıtıwshılardıń imtixan tólemleri tolıq qaytarıp beriledi.

3. Barlıq mektep oqıtıwshıları ushın ulıwma jańalıqlar

• 1 aylıq májbúriy mamanlıq arttırıw kursları biykar etildi: Paytaxtqa yamasa wálayat orayına barıp oqıw májbúriyatı ornına kásiplik rawajlanıw vaucherleri engiziledi. Muǵallim topar sınaǵındaǵı nátiyjesine qaray 18-den 72 saatqa shekem bolǵan kurstı hám oqıw ornın ózi tańlaydı.

• Lider muǵallimlerge 30 mln som: Hár jılı elimizdegi 208 rayon hám qalanıń eń alfavı oqıtıwshılarına 30 million somnan bir mártelik sıylıq tapsırıladı.

• 1 000 muǵallim shet elde stajirovka óteydi: Ullı Britaniya, Franciya, Singapur sıyaqlı mámleketlerge tájiriybe arttırıw ushın jiberiledi.

• Perzentler kontraktine procentisiz kredit: Keminde 15 jıl pedagogikalıq stajǵa iye muǵallimlerdiń perzentlerine joqarı oqıw ornı tólemli-kontraktı ushın procentisiz kredit ajıratıladı.

• Jańa mámleketlik sıylıq: Ilǵar pedagoglar ushın Abdulla Avloniy atındaǵı arnawlı mámleketlik sıylıq shólkemlestiriledi.

4. Hayal-qızlar hám mektepke shekemgi tálim (Baqsha) tarawı ushın

• Islewshi analar ushın biypul baqsha: Kelesi jıl 1-yanvardan 2–3 jaslı perzentin shańaraqlıq mámleketlik emes baqshaǵa bergen islewshi hayallardıń aylıq tólem pulı mámleketlik byudjetten qaplap beriledi.

• Tárbiyashılar ushın joqarı tálim 3 jıl boladı: Islep turıp joqarı oqıw ornına kirgen tárbiyashılar ushın pedagogikalıq oqıw múddeti 4 jıldan 3 jılǵa qısqaradı.

• Járdemshilerge de imkaniyat: Baqshada keminde 5 jıllıq jumıs tájiriybesine iye bolǵan tárbiyashı járdemshileri de usı 3 jıllıq oqıw jeńilliginen paydalana aladı.

5. Menshikli mektepler hám ata-analar ushın jeńillikler

• 52 rayon ushın kredit hám subsidiya: Oqıw júklemesi joqarı bolǵan 52 rayonda menshikli mektep ashıw ushın 7 jılǵa 10 payızlı jeńillikli kredit hám 1,5 milliard somǵa shekem subsidiya beriledi.

• Biypul imaratlar hám salıq jeńilligi: Bos turǵan mámleketlik imaratlar menshikli mektep shólkemlestiriw ushın 10 jılǵa biypul ijaraǵa beriledi. Imaratın mektepke ijaraǵa bergen múlk iyeleri jer hám múlk salıǵınan azat etiledi.

• Xalıqaralıq akkreditaciya qárejetiniń 50 payızı qaplanadı: Menshikli mekteplerdiń abıraylı xalıqaralıq akkreditaciyadan ótiw qárejetiniń yarımı mámleket tárepinen tólep beriledi.

• Ata-analarǵa salıqtan jıllıq 6–7 mln som únemlew: Perzenti menshikli mektepte oqıytuǵın ata-analardıń salıq alınbaytuǵın aylıq dáramat shegarası 3 millionnan 6 million somǵa asırıladı (artıqsha tólengen dáramat salıǵı hár ayda avtomatikalıq tárizde qaytarıladı).

Ulusınday keń kólemli jańalıqlar hám jeńillikler nızamlı hújjetler tastıyıqlanıwı menen basqıshpa-basqısh ámeliyatqa engiziledi.

Ustazlar hám tálimshiler ushın 5 áhmiyetli jańalıq

Pikirler (0)